അഴിയൂർ: കോഴിക്കോട് ജില്ല വിദ്യാഭ്യാസ വകുപ്പും പ്രൊഫ. ശോഭീന്ദ്രൻ ഫൗണ്ടേഷനും ചേർന്ന് നിറവ് സീറോ വേസ്റ്റ് മാനേജ്മെന്റിന്റെ സഹായത്തോടെ നടപ്പിലാക്കുന്ന 'ഹരിത ഭവനം' പദ്ധതിയുടെ വടകര വിദ്യാഭ്യാസ ജില്ലയിലേ അധ്യാപക പരിശീലനം പൂർത്തിയായി. വിദ്യാഭ്യാസ ജില്ലാതലത്തിൽ ഹൈസ്കൂൾ അധ്യാപകരുടെ പരിശീലനം നേരത്തെ പൂർത്തിയായിരുന്നു. താമരശ്ശേരി വിദ്യാഭ്യാസ ജില്ലയിലെ പ്രൈമറി അധ്യാപകർക്കുള്ള പരിശീലനങ്ങളും പൂർത്തിയായതാണ്. വടകര വിദ്യാഭ്യാസ ജില്ലയിലെ ഉപജില്ലാ തലങ്ങളിൽ നടന്ന പ്രൈമറി അധ്യാപകർക്കുള്ള പരിശീലനം ചോമ്പാല ഉപജില്ലയിലെ അധ്യാപക ശില്പശാലയോടു കൂടി പൂർത്തിയാവുകയായിരുന്നു. അഴിയൂർ ഗവ. ഹയർ സെക്കൻഡറി സ്കൂളിൽ നടന്ന ശിൽപശാല ബ്ലോക്ക് പഞ്ചായത്ത് പ്രസിഡണ്ട് കെ പി ഗിരിജ ഉദ്ഘാടനം ചെയ്തു. എ ഇ ഒ സപ്ന ജൂലിയറ്റ് അധ്യക്ഷയായി. പ്രൊഫ. ശോഭീന്ദ്രൻ ഫൗണ്ടേഷൻ പ്രസിഡണ്ട് വടയക്കണ്ടി നാരായണൻ പദ്ധതി വിശദീകരിച്ചു. സെക്രട്ടറി സെഡ് എ സൽമാൻ ശില്പശാലയ്ക്ക് നേതൃത്വം നൽകി. സ്കൂൾ ഹെഡ്മിസ്ട്രസ് രേഖ കാക്കാടി, എച്ച് എം ഫോർ എം കൺവീനർ കിരൺ ലാൽ, ഹരിത ഭവനം ഉപജില്ല കോഡിനേറ്റർമാരായ ബി സുജിത് കുമാർ, കെ ശ്രീനേഷ് തുടങ്ങിയവർ സംസാരിച്ചു. ഉപജില്ലയിലെ പ്രവർത്തനങ്ങൾ ഏകോപിപ്പിക്കാൻ ബി സുജിത്ത് കുമാർ, കെ ശ്രീനേഷ് എന്നിവർ കോഡിനേറ്റർമാരും ഉപജില്ല പരിധിയിലെ എല്ലാ പഞ്ചായത്തിലെയും ഓരോ അധ്യാപകർ അംഗങ്ങളും ആയി സമിതി രൂപീകരിച്ചു.
മാലിന്യനിർമാർജനം, ഊർജ്ജസംരക്ഷണം, ജലസംരക്ഷണം, ഭക്ഷ്യ സുരക്ഷ എന്നീ മേഖലകളിൽ സ്വയം പര്യാപ്തമായ യൂണിറ്റുകൾ ആക്കി വീടുകളെ മാറ്റുന്ന പദ്ധതിയാണ് ഹരിത ഭവനം. ജില്ലയിലെ വിദ്യാർത്ഥികളുടെയും അധ്യാപകരുടെയും വീടുകൾ ഹരിത ഭവനങ്ങളും വിദ്യാലയങ്ങൾ ഹരിതവിദ്യാലയങ്ങളും ആക്കി മാറ്റുകയാണ് ഒന്നാംഘട്ടത്തിൽ ചെയ്യുക. ഇവിടങ്ങളിൽ മൂന്ന് പെട്ടികൾ വച്ച് മാലിന്യങ്ങൾ വൃത്തിയാക്കി തരംതിരിച്ച് ശേഖരിച്ച് ഹരിത കർമ്മ സേനയ്ക്ക് കൈമാറുകയും ഊർജ്ജവ്യയവും ജലവ്യയവും പരമാവധി കുറക്കുകയും വീട്ടുവളപ്പിൽ പരമാവധി കൃഷി ചെയ്യുകയും ആണ് ലക്ഷ്യമിടുന്നത്.
അധ്യാപക പരിശീലനം പൂർത്തിയാക്കിയ ജില്ലയിലെ ഹൈസ്കൂളുകളിലെ വിദ്യാർത്ഥികളും താമരശ്ശേരി, വടകര വിദ്യാഭ്യാസ ജില്ലകളിലെ പ്രൈമറി വിദ്യാർത്ഥികളും ചേർന്ന് 2800ലേറെ ഹരിതഭവനങ്ങൾ ഇതിനകം സൃഷ്ടിച്ചു കഴിഞ്ഞിട്ടുണ്ട്. ഇവർക്കൊക്കെയും സർട്ടിഫിക്കറ്റുകളും നൽകി. ആയിരം ഹരിത ഭവനങ്ങളുടെ പ്രഖ്യാപനം നേരത്തെ ജില്ലാ കലക്ടർ നിർവഹിച്ചിരുന്നു.
