വയനാട് മുണ്ടക്കൈ, ചൂരൽമല ഉരുൾപൊട്ടലിൽ രക്ഷാദൗത്യം തുടരുകയാണ്. മരണസംഖ്യ 282 ആയി ഉയർന്നിരിക്കുന്നു. 195 പേർ ചികിത്സയിലും, ഇരുന്നൂറിലധികം പേരെ കാണാതായതായും റിപ്പോർട്ടുകളുണ്ട്. മുണ്ടക്കൈയിൽ നിന്നും ചാലിയാറിൽ നിന്നുമായി ഇതുവരെ 98 മൃതദേഹങ്ങൾ കണ്ടെത്തിയിട്ടുണ്ട്. രക്ഷാപ്രവർത്തനം കൂടുതൽ ദ്രുതഗതിയിലാക്കാൻ ബെയ്ലിൻ പാലത്തിന്റെ നിർമ്മാണം ഇന്ന് പൂർത്തിയാക്കും.
190 അടി നീളമുള്ള ബെയ്ലി പാലത്തിന്റെ നിർമ്മാണം ഇന്ന് വൈകിട്ടോടെ പൂർത്തിയാകും. സമാന്തരമായി നടപ്പാലയുടെ നിർമ്മാണവും നടക്കുന്നുണ്ട്. നേരത്തെ സൈന്യം തയ്യാറാക്കിയ താൽക്കാലിക പാലം മലവെള്ളപ്പാച്ചിലിൽ മുങ്ങിയതിനാലാണ് രക്ഷാപ്രവർത്തകർക്കായി ഈ ചെറിയ പാലം നിർമ്മിച്ചത്. സൈന്യത്തിന്റെ നേതൃത്വത്തിൽ ഇന്നലെ രാത്രിയാണ് നിർമ്മാണം നടത്തിയത്. ഇതുവരെ 1600 ഓളം പേരെ രക്ഷപ്പെടുത്താൻ കഴിഞ്ഞിട്ടുണ്ട്.
മണ്ണിനടിയിലെ മനുഷ്യ സാന്നിധ്യം കണ്ടെത്താൻ 3 സ്നിഫർ നായ്ക്കളും ദൗത്യ സംഘത്തിനൊപ്പമുണ്ട്. വയനാട്ടിൽ ആകെ 82 ദുരിതാശ്വാസ ക്യാമ്പുകൾ തുറന്നിട്ടുണ്ട്, അവയിൽ 8000-ത്തിലധികം പേർ കഴിയുന്നു. ഇന്നലെ രാത്രി ഒരു മണ്ണുമാന്തിയന്ത്രം കൂടി മുണ്ടക്കൈയിൽ എത്തിച്ചു, ഇതോടെ ആകെ നാല് യന്ത്രങ്ങൾ എത്തിച്ചിട്ടുണ്ട്. ഇന്ന് കൂടുതൽ മണ്ണുമാന്തി യന്ത്രങ്ങൾ സജ്ജമാക്കും.
