തിരുവനന്തപുരം: കൊങ്കൺ പാതയിൽ മഴക്കാല ടൈംടേബിൾ അവസാനിക്കുന്നതോടെ ഒക്ടോബർ 21 മുതൽ തീവണ്ടികളുടെ സമയത്തിൽ മാറ്റം വരും. ജൂൺ 15 മുതൽ പ്രാബല്യത്തിലുണ്ടായിരുന്ന മൺസൂൺ ടൈംടേബിൾ ഒക്ടോബർ 20-ഓടെ അവസാനിക്കും. ഇതോടെ കേരളത്തിൽ നിന്ന് കൊങ്കൺ വഴി സർവീസ് നടത്തുന്ന മംഗള, നേത്രാവതി, രാജധാനി തുടങ്ങിയ പ്രമുഖ ദീർഘദൂര തീവണ്ടികളുടെ പുറപ്പെടുന്ന സമയത്തിലും ഓട്ടത്തിലും മണിക്കൂറുകളുടെ വ്യത്യാസമുണ്ടാകും.
മഴക്കാലത്ത് സുരക്ഷ മുൻനിർത്തി 40 മുതൽ 75 കിലോമീറ്റർ വരെയായി കുറച്ചിരുന്ന കൊങ്കൺ പാതയിലെ വേഗപരിധി, ഒക്ടോബർ 21 മുതൽ സാധാരണ നിലയിലുള്ള 110-120 കിലോമീറ്ററിലേക്ക് ഉയർത്തും. ഇതോടെയാണ് മൺസൂൺ കാലത്ത് നേരത്തെ പുറപ്പെട്ടിരുന്ന ട്രെയിനുകൾ സാധാരണ സമയത്തേക്ക് മാറുന്നത്.
പ്രധാന തീവണ്ടികളുടെ പുതിയ സമയം (ഒക്ടോബർ 21 മുതൽ):
* എറണാകുളം–നിസാമുദ്ദീൻ മംഗള എക്സ്പ്രസ് (12617): എറണാകുളത്തുനിന്ന് ഉച്ചയ്ക്ക് 1.25-ന് പുറപ്പെടും (നിലവിൽ രാവിലെ 10.30).
* തിരുവനന്തപുരം–നിസാമുദ്ദീൻ രാജധാനി (12431): തിരുവനന്തപുരത്തുനിന്ന് രാത്രി 7.15-ന് പുറപ്പെടും (നിലവിൽ ഉച്ചയ്ക്ക് 2.40).
* എറണാകുളം–അജ്‌മീർ മരുസാഗർ എക്സ്പ്രസ് (12977): രാത്രി 10.25-ന് പുറപ്പെടും (നിലവിൽ വൈകീട്ട് 6.50).
* എറണാകുളം–പൂനെ എക്സ്പ്രസ് (22149): രാവിലെ 5.15-ന് പുറപ്പെടും (നിലവിൽ പുലർച്ചെ 2.15).
* തിരുവനന്തപുരം നോർത്ത്–ചണ്ഡീഗഢ് സമ്പൂർക്കക്രാന്തി (12217): രാവിലെ 9.10-ന് പുറപ്പെടും (നിലവിൽ പുലർച്ചെ 4.50).
* എറണാകുളം–ഓഖ എക്സ്പ്രസ് (16338): രാത്രി 10.25-ന് പുറപ്പെടും (നിലവിൽ രാത്രി 8.25).
* തിരുവനന്തപുരം–ലോകമാന്യതിലക് നേത്രാവതി (16346): തിരുവനന്തപുരത്തുനിന്ന് രാവിലെ 9.15-ന് തന്നെ പുറപ്പെടും (എറണാകുളം ഉച്ചയ്ക്ക് 1.10, ഷൊർണൂർ വൈകീട്ട് 4.20, കോഴിക്കോട് 5.05, കണ്ണൂർ 6.37).
* മടക്ക സർവീസ് (16345 നേത്രാവതി): മംഗളൂരു ജങ്ഷൻ പുലർച്ചെ 4.20, കണ്ണൂർ 6.32, കോഴിക്കോട് 8.07, ഷൊർണൂർ 10.15, എറണാകുളം 12.20, തിരുവനന്തപുരം രാത്രി 6.10.
തീവണ്ടികളുടെ സമയം കൃത്യമായി മനസ്സിലാക്കി യാത്ര പ്ലാൻ ചെയ്യുന്നതിനായി നാഷണൽ ട്രെയിൻ എൻക്വയറി സിസ്റ്റം (NTES) ആപ്പും ഔദ്യോഗിക വെബ്‌സൈറ്റും ഉപയോഗിക്കണമെന്ന് റെയിൽവേ അറിയിച്ചു.
