പുതിയ നിബന്ധന പ്രകാരം ₹5,000ന്റെ ഇടപാടിന് ₹20, ₹10,000ന്റെ ഇടപാടിന് ₹40, ₹25,000ന്റെ ഇടപാടിന് ₹100 എന്നിങ്ങനെ വ്യാപാരികൾ ഫീസായി നൽകേണ്ടിവരും. ₹75,000ന് മുകളിലുള്ള ഇടപാടുകൾക്ക് പരമാവധി ₹300 ആണ് ഫീസ്. ഉപഭോക്താക്കളിൽ നിന്ന് നേരിട്ട് തുക ഈടാക്കില്ലെങ്കിലും, വ്യാപാരികളുടെ വരുമാനത്തിൽ നിന്ന് ഈ തുക കുറയുന്നത് പ്രവർത്തനച്ചെലവ് ഉയർത്തുമെന്നാണ് ആശങ്ക.
ഹോട്ടലുകൾക്ക് പുറമെ സൂപ്പർമാർക്കറ്റ് മേഖലയും പ്രതിഷേധരംഗത്തുണ്ട്. ഒക്ടോബർ 15-ന് യുപിഐ പേയ്മെന്റുകൾ പൂർണ്ണമായും ഒഴിവാക്കുമെന്ന് സൂപ്പർമാർക്കറ്റ് വെൽഫെയർ അസോസിയേഷൻ കേരള പ്രഖ്യാപിച്ചു.
അതേസമയം, വ്യക്തികൾ തമ്മിലുള്ള പണമിടപാടുകൾക്കും ₹2,000 വരെയുള്ള വ്യാപാര ഇടപാടുകൾക്കും ഫീസ് ബാധകമല്ലെന്ന് കേന്ദ്ര ധനമന്ത്രാലയം വ്യക്തമാക്കി. ആകെ യുപിഐ ഇടപാടുകളുടെ 96 ശതമാനവും ഫീസ് പരിധിക്ക് പുറത്തായിരിക്കുമെന്നാണ് സർക്കാരിന്റെ വിശദീകരണം. അതിനിടെ, പുതിയ സംവിധാനം നടപ്പാക്കുന്നത് അടുത്ത വർഷം ജനുവരി ഒന്നിലേക്ക് മാറ്റിവെക്കാൻ സാധ്യതയുണ്ടെന്നും റിപ്പോർട്ടുകളുണ്ട്.
