ന്യൂഡൽഹി: മൂന്നാം മോദി സർക്കാരിന്റെ മൂന്നാം ബജറ്റ് ധനമന്ത്രി നിർമ്മല സീതാരാമൻ ലോക്സഭയിൽ അവതരിപ്പിച്ചു. തുടർച്ചയായി ഒൻപത് തവണ ബജറ്റ് അവതരിപ്പിക്കുന്ന ധനമന്ത്രിയെന്ന ചരിത്ര നേട്ടം ഇതോടെ നിർമ്മല സീതാരാമൻ സ്വന്തമാക്കി. ഒരു മണിക്കൂർ 26 മിനിറ്റ് നീണ്ടുനിന്ന പ്രസംഗത്തിൽ രാജ്യത്തിന്റെ സാമ്പത്തിക വളർച്ചയിൽ ഊന്നിയുള്ള പ്രഖ്യാപനങ്ങളാണ് ഉണ്ടായതെങ്കിലും കേരളത്തിന്റെ ദീർഘകാല ആവശ്യങ്ങളോട് ബജറ്റ് മുഖംതിരിച്ചു.
കേരളത്തിന് അവഗണന:
കേരളം ഏറെ പ്രതീക്ഷയോടെ കാത്തിരുന്ന എയിംസ് (AIIMS), അതിവേഗ റെയിൽ പദ്ധതികൾ ഇത്തവണയും പ്രഖ്യാപിക്കപ്പെട്ടില്ല. അപൂർവ്വ ധാതുക്കൾക്കായുള്ള പ്രത്യേക ഇടനാഴി, കടലാമ പരിപാലന പദ്ധതി എന്നിവയിൽ കേരളം ഉൾപ്പെട്ടതാണ് ഏക ആശ്വാസം. റെയിൽവേ വികസനത്തിലോ വലിയ അടിസ്ഥാന സൗകര്യ വികസന പദ്ധതികളിലോ കേരളത്തിന് കാര്യമായ വിഹിതം ലഭിച്ചില്ലെന്ന വിലയിരുത്തലാണ് ഉയരുന്നത്.
ബജറ്റിലെ പ്രധാന നാഴികക്കല്ലുകൾ:
* ചരിത്ര നേട്ടം: മുൻ പ്രധാനമന്ത്രി മൊറാർജി ദേശായിയുടെ (10 ബജറ്റുകൾ) റെക്കോർഡിന് തൊട്ടടുത്തെത്തി നിർമ്മല സീതാരാമൻ.
* ഞായറാഴ്ച ബജറ്റ്: രാജ്യത്തിന്റെ ചരിത്രത്തിലാദ്യമായാണ് പൊതു അവധി ദിവസമായ ഞായറാഴ്ച കേന്ദ്ര ബജറ്റ് അവതരിപ്പിക്കുന്നത്.
* വളർച്ചാ പ്രവചനം: 2026 സാമ്പത്തിക വർഷത്തിൽ ഇന്ത്യ 7.4 ശതമാനം വളർച്ച കൈവരിക്കുമെന്ന് സാമ്പത്തിക സർവേ പ്രവചിക്കുന്നു. അടുത്ത സാമ്പത്തിക വർഷത്തിൽ ഇത് 6.8 - 7.2 ശതമാനമായിരിക്കുമെന്നും റിപ്പോർട്ട് വ്യക്തമാക്കുന്നു.
നേരത്തെ രാഷ്ട്രപതി ഭവനിലെത്തി രാഷ്ട്രപതി ദ്രൗപതി മുർമുവിനെ കണ്ട് ധനമന്ത്രി ബജറ്റ് അവതരണത്തിന് അനുമതി തേടിയിരുന്നു. തുടർന്ന് കേന്ദ്ര മന്ത്രിസഭ യോഗം ചേർന്നാണ് ബജറ്റിന് ഔദ്യോഗിക അംഗീകാരം നൽകിയത്.
