"നായ്ക്കളെ തുരത്താൻ പൂച്ചകളെ വളർത്തണോ?"; തെരുവുനായ വിഷയത്തിൽ വീണ്ടും മൃഗസ്‌നേഹികളെ പരിഹസിച്ച് സുപ്രീം കോടതി

ന്യൂഡൽഹി: തെരുവുനായ്ക്കളെ നിയന്ത്രിക്കുന്നതുമായി ബന്ധപ്പെട്ട കേസിൽ വാദം തുടരുന്നതിനിടെ മൃഗസ്‌നേഹികളുടെ വാദങ്ങളെ പരിഹസിച്ച് സുപ്രീം കോടതി. നായ്ക്കളും പൂച്ചകളും ശത്രുക്കളാണെന്നും, അതിനാൽ നായ്ക്കളെ നിയന്ത്രിക്കാൻ കൂടുതൽ പൂച്ചകളെ പ്രോത്സാഹിപ്പിക്കുന്നത് നന്നായിരിക്കും എന്നുമായിരുന്നു ജസ്റ്റിസ് സന്ദീപ് മേത്തയുടെ പരിഹാസരൂപേണയുള്ള പരാമർശം.

തുടർച്ചയായ രണ്ടാം ദിവസമാണ് കേസിൽ മൃഗസ്‌നേഹികളുടെ നിലപാടുകളെ കോടതി വിമർശിക്കുന്നത്. തെരുവുകളിൽ നിന്ന് നായ്ക്കളെ നീക്കം ചെയ്താൽ എലികളുടെ എണ്ണം വർധിക്കുമെന്നും അത് പ്ലേഗ് പോലുള്ള രോഗങ്ങൾക്ക് കാരണമാകുമെന്നും മൃഗസ്‌നേഹികൾക്ക് വേണ്ടി ഹാജരായവർ വാദിച്ചു. നായ്ക്കൾ പ്രകൃതിയുടെ സന്തുലിതാവസ്ഥ നിലനിർത്തുന്നു എന്നായിരുന്നു ഇവരുടെ വാദം.

കോടതിയിൽ ഉയർന്ന പ്രധാന വാദങ്ങൾ:

 * ഫണ്ടിന്റെ അഭാവം: എല്ലാ ജില്ലകളിലും വന്ധ്യംകരണ (ABC) കേന്ദ്രങ്ങൾ സ്ഥാപിക്കാൻ 1600 കോടി രൂപ ആവശ്യമാണെന്നും എന്നാൽ ബജറ്റിൽ ഇതിനായി തുക വകയിരുത്തിയിട്ടില്ലെന്നും മൃഗസ്‌നേഹികൾ ചൂണ്ടിക്കാട്ടി.

 * ഏകോപനം: പദ്ധതി നടപ്പിലാക്കാൻ അഞ്ച് പ്രധാന വകുപ്പുകളുടെ ഏകോപനം അനിവാര്യമാണ്.

 * മൈക്രോചിപ്പ്: തെരുവുനായ്ക്കൾക്ക് മൈക്രോചിപ്പ് ഘടിപ്പിക്കണമെന്ന നിർദ്ദേശം മൃഗസ്‌നേഹികൾ മുന്നോട്ടുവെച്ചെങ്കിലും, മൈക്രോചിപ്പുകൾ വളർത്തുനായ്ക്കൾക്ക് വേണ്ടിയുള്ളതാണെന്ന് കോടതി മറുപടി നൽകി.

തെരുവുനായ്ക്കളെ കൂട്ടത്തോടെ മാറ്റുന്നത് അപ്രതീക്ഷിത പ്രത്യാഘാതങ്ങൾ ഉണ്ടാക്കുമെന്നും എബിസി ചട്ടങ്ങൾ കർശനമായി നടപ്പിലാക്കുകയാണ് പോംവഴിയെന്നും മൃഗസ്‌നേഹികൾ വാദിച്ചു. കേസിൽ വാദം തുടരുകയാണ്.