കോഴിക്കോട് | 19 ജനുവരി 2026
കെഎസ്ആർടിസി ബസിൽ വെച്ച് ലൈംഗികാതിക്രമം നടത്തിയെന്ന യുവതിയുടെ ആരോപണത്തിന് പിന്നാലെ യുവാവ് ജീവനൊടുക്കിയ സംഭവത്തിൽ നിയമപോരാട്ടത്തിനൊരുങ്ങി കുടുംബം. വ്യക്തിഹത്യയെത്തുടർന്നുണ്ടായ കടുത്ത മാനസിക സമ്മർദമാണ് ദീപക്കിന്റെ ആത്മഹത്യയ്ക്ക് കാരണമെന്ന് ചൂണ്ടിക്കാട്ടിയാണ് കുടുംബം പരാതി നൽകുന്നത്.
സമൂഹമാധ്യമങ്ങളിലൂടെയും മറ്റും നടന്ന വ്യാപകമായ പ്രചാരണം ദീപക്കിനെ തളർത്തിയെന്നും, നീതി ലഭിക്കുന്നത് വരെ പോരാട്ടം തുടരുമെന്നും കുടുംബാംഗങ്ങൾ വ്യക്തമാക്കി. സംഭവത്തിൽ മെഡിക്കൽ കോളേജ് പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്.
യുവതി ഉന്നയിച്ച ആരോപണങ്ങളുടെ സത്യാവസ്ഥയും മരണത്തിലേക്ക് നയിച്ച സാഹചര്യങ്ങളും പോലീസ് വിശദമായി പരിശോധിച്ചുവരികയാണ്. യുവാവിന്റെ ഫോൺ രേഖകളും സോഷ്യൽ മീഡിയ പോസ്റ്റുകളും അന്വേഷണത്തിന്റെ ഭാഗമായി ശേഖരിക്കും.
