കണ്ണൂർ: റോഡപകടങ്ങൾ വർദ്ധിച്ചു വരുന്ന സാഹചര്യത്തിൽ, പുതുതലമുറയെ ലക്ഷ്യമിട്ട് റോഡ് സുരക്ഷാ ബോധവൽക്കരണം ശക്തമാക്കാൻ മോട്ടോർ വാഹന വകുപ്പ് (എം.വി.ഡി.) ഒരുങ്ങുന്നു. കുട്ടികളെ ആകർഷിക്കുന്ന രീതിയിൽ ആനിമേഷൻ വീഡിയോകളും റീലുകളും ലേണേഴ്സ് മാനേജ്മെന്റ് സംവിധാനവും തയ്യാറാക്കാനാണ് വകുപ്പ് നടപടി ആരംഭിച്ചിരിക്കുന്നത്.
നിലവിൽ എം.വി.ഡി. സാമൂഹിക മാധ്യമങ്ങളിൽ പ്രചരിപ്പിക്കുന്ന വീഡിയോകൾക്ക് പുതുതലമുറ കാഴ്ചക്കാർ കുറവായതിനാലാണ് പുതിയ മാർഗ്ഗങ്ങൾ തേടുന്നത്. യുവതലമുറയെ ആകർഷിക്കുന്ന 'ന്യൂജെൻ' ആനിമേഷൻ കണ്ടന്റുകളിലൂടെ റോഡ് നിയമങ്ങളെക്കുറിച്ച് അവരെ ബോധവാന്മാരാക്കുകയാണ് ലക്ഷ്യം.
സ്റ്റാർട്ടപ്പ് മിഷൻ വഴി ചുമതലയേൽപ്പിച്ചു
ആനിമേഷൻ വീഡിയോകൾ തയ്യാറാക്കാൻ ശേഷിയുള്ള സ്റ്റാർട്ടപ്പുകളെ കണ്ടെത്താനുള്ള ചുമതല കേരള സ്റ്റാർട്ടപ്പ് മിഷനെയാണ് ഏൽപ്പിച്ചത്. സ്റ്റാർട്ടപ്പ് മിഷൻ നടത്തിയ വിലയിരുത്തലിൽ 'എസ്ആർവി ഐടി ഹബ്' എന്ന സ്ഥാപനം ഒന്നാമതെത്തി. ആനിമേഷൻ കണ്ടന്റുകൾ തയ്യാറാക്കുന്നതിനായി ഇവരെ ചുമതലപ്പെടുത്തും. ഈ പദ്ധതിക്കായി 7.5 ലക്ഷം രൂപയാണ് എം.വി.ഡി. അനുവദിച്ചിട്ടുള്ളത്.
ഈ നവീകരിച്ച വീഡിയോകളും ഇൻഫോ കാർഡുകളും സാമൂഹിക മാധ്യമങ്ങൾ വഴിയും, സ്കൂളുകളിൽ നടത്തുന്ന ബോധവൽക്കരണ പരിപാടികൾ വഴിയും, മുഖ്യധാരാ മാധ്യമങ്ങൾ വഴിയും പ്രചരിപ്പിക്കും. ലെയ്ൻ ട്രാഫിക് നിയമങ്ങൾ ലംഘിക്കുന്ന പ്രവണത ഉൾപ്പെടെയുള്ള കാര്യങ്ങളിൽ മാറ്റം കൊണ്ടുവരാൻ ഇത് സഹായിക്കുമെന്നാണ് മോട്ടോർ വാഹന വകുപ്പിന്റെ പ്രതീക്ഷ.
