തിരുവനന്തപുരം: (നവംബർ 27): രാവിലെ സ്കൂളിൽ പോകാൻ വിസമ്മതിച്ചതിനെ തുടർന്ന് രക്ഷിതാക്കൾ നിർബന്ധിച്ച് പറഞ്ഞയച്ച എട്ടാം ക്ലാസ് വിദ്യാർത്ഥി വീട്ടിൽ തിരിച്ചെത്തിയ ശേഷം ജീവനൊടുക്കി. തിരുവനന്തപുരം കുന്നത്തുകാലിൽ നടന്ന ഈ ദാരുണ സംഭവം നാടിനെ നടുക്കിയിരിക്കുകയാണ്.
കുന്നത്തുകാൽ നാറാണിയിൽ രതീഷ്-ബിന്ദു ദമ്പതികളുടെ ഏക മകൻ അനന്തു (13) ആണ് മരിച്ചത്. കാരക്കോണം പി.പി.എം. ഹൈസ്കൂളിലെ വിദ്യാർത്ഥിയായിരുന്നു.
സംഭവദിവസം രാവിലെ അനന്തു സ്കൂളിൽ പോകാൻ മടി കാണിച്ചു. എന്നാൽ, രക്ഷിതാക്കൾ നിർബന്ധിച്ചതോടെ കുട്ടി സ്കൂളിലേക്ക് പോവുകയായിരുന്നു. വൈകുന്നേരം വീട്ടിൽ തിരിച്ചെത്തിയ വിദ്യാർത്ഥിയെ രാത്രിയോടെ മുറിയിലെ ഫാനിൽ തൂങ്ങിയ നിലയിൽ കണ്ടെത്തുകയായിരുന്നു. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
സംഭവത്തിൽ വെള്ളറട പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്. വിദ്യാർത്ഥിയുടെ മരണകാരണം സംബന്ധിച്ച് വ്യക്തമായ വിവരങ്ങൾ ഇതുവരെ ലഭ്യമല്ല. പോസ്റ്റുമോർട്ടത്തിനുശേഷം ഇന്ന് മൃതദേഹം സംസ്കരിച്ചു.
ആത്മഹത്യാ ചിന്തകളുളളവർക്ക് സഹായത്തിനായി:
ആത്മഹത്യ ഒന്നിനും പരിഹാരമല്ല. അതിജീവിക്കാൻ ശ്രമിക്കുക. മാനസികാരോഗ്യ വിദഗ്ധരുടെ സഹായം തേടുക.
> 'ദിശ' ഹെൽപ് ലൈൻ: ടോൾ ഫ്രീ നമ്പർ: 1056, 0471-2552056
