തിരുവനന്തപുരം:കേരളത്തിലെ ടെക് പാർക്കുകളിൽ ഹൈ സ്പീഡ് ഇന്റർനെറ്റ് സൌകര്യമൊരുക്കാൻ കെ-ഫോൺ മുന്നോട്ടു വരുന്നു. ടെക്‌നോ പാർക്ക്, ഇൻഫോ പാർക്ക്, സൈബർ പാർക്ക് എന്നിവിടങ്ങളിലെ അടിസ്ഥാന സൗകര്യങ്ങളെ ശക്തിപ്പെടുത്തുന്നതിനായി കെ-ഫോൺ അധികൃതരും ടെക് പാർക്ക് പ്രതിനിധികളും തമ്മിൽ ചർച്ചകൾ നടത്തി.
ആദ്യ ഘട്ടത്തിൽ ഈ മൂന്ന് പ്രധാന ഐ.ടി. പാർക്കുകളിലും അതിവേഗ ഇൻറർനെറ്റ് കണക്റ്റിവിറ്റി ഉറപ്പാക്കുകയാണ് ലക്ഷ്യം. സ്റ്റാർട്ടപ്പുകൾക്കും ഐ.ടി. കമ്പനികൾക്കും കൂടുതൽ കാര്യക്ഷമമായ പ്രവർത്തനമേഖല സൃഷ്ടിക്കാനായുള്ള സർക്കാരിന്റെ ശ്രമങ്ങളുടെ ഭാഗമായാണ് ഈ പദ്ധതി.
ടെക് സമൂഹത്തിന് വലിയ പിന്തുണയാകുമെന്ന് കെ-ഫോൺ പ്രതിനിധികൾ വ്യക്തമാക്കി. കൂടുതൽ മേഖലകളിലേക്കും പദ്ധതി പിന്നീടായി വ്യാപിപ്പിക്കുമെന്ന് സൂചനയുണ്ട്.
