ന്യൂഡല്‍ഹി: ഇന്ത്യന്‍ ചലച്ചിത്ര മേഖലയിലെ പരമോന്നത ബഹുമതിയായ ദാദാസാഹേബ് ഫാല്‍ക്കെ പുരസ്‌കാരം മലയാളത്തിന്റെ പ്രിയതാരമായ മോഹന്‍ലാലിന്. 2023 ലെ പുരസ്‌കാരത്തിനാണ് മോഹന്‍ലാല്‍ അര്‍ഹനായത്. സെപ്തംബര്‍ 23-ന് നടക്കുന്ന ദേശീയ ചലച്ചിത്ര പുരസ്‌കാര വിതരണ ചടങ്ങില്‍ രാഷ്ട്രപതിയാണ് അവാര്‍ഡ് സമ്മാനിക്കുന്നത്.
മലയാള സിനിമയ്ക്ക് പിന്നാലെ ദേശീയ സിനിമാപ്രസ്ഥാനത്തും തന്റെ മികച്ച പ്രകടനങ്ങളിലൂടെ അമരക്കാരനായ മോഹന്‍ലാല്‍, 40 വര്‍ഷത്തിലധികം നീളുന്ന കരിയറില്‍ 350-ലധികം ചിത്രങ്ങളില്‍ അഭിനയിച്ചിട്ടുണ്ട്. അടൂര്‍ ഗോപാലകൃഷ്ണന് ശേഷം ദാദാസാഹേബ് ഫാല്‍ക്കെ പുരസ്‌കാരം നേടുന്ന രണ്ടാമത്തെ മലയാളി കലാകാരനാണ് മോഹന്‍ലാല്‍.
ഇന്ത്യന്‍ സിനിമയുടെ പിതാവായി അറിയപ്പെടുന്ന ദാദാസാഹേബ് ഫാല്‍ക്കെയുടെ സ്മരണയ്ക്കായി 1969 മുതല്‍ കേന്ദ്രസര്‍ക്കാര്‍ നല്‍കിവരുന്ന ഏറ്റവും വലിയ ചലച്ചിത്ര പുരസ്‌കാരമാണ് ഇത്. 2004-ലാണ് അടൂര്‍ ഗോപാലകൃഷ്ണന് ഈ ബഹുമതി ലഭിച്ചത്.
