വ്യാപാരികൾക്ക് നികുതി കുടിശിക വീട്ടാൻ ജൂൺ 30 വരെ സമയം

 

വ്യാപാരികൾക്ക് ഇളവുകളോടെ നികുതി കുടിശിക ജൂൺ 30 വരെ തീർപ്പാക്കാം. ബജറ്റിൽ പ്രഖ്യാപിച്ച ജനറൽ, പ്രളയ സെസ്, ബാർ ഹോട്ടൽ ആംനെസ്റ്റികളും ഡിസ്റ്റിലറി അരിയർ സെറ്റിൽമെന്റ് സ്കീമും വഴിയാണ് ഇളവു ലഭിക്കുക.

നികുതി കുടിശികയുടെ നിശ്ചിത ശതമാനം കിഴിവാണ് ജനറൽ ആംനെസ്റ്റിയിൽ 3 സ്ലാബുകളിലായി അനുവദിക്കുക. പിഴയും പലിശയും പൂർണമായി ഒഴിവാക്കും. ഓരോ നികുതി നിർണയ ഉത്തരവിനും പ്രത്യേകം അപേക്ഷ നൽകണം. പ്രളയ സെസ് ജൂൺ 30നു മുൻപ് www.etreasury.kerala.gov.in എന്ന ഇ ട്രഷറി പോർട്ടൽ വഴി അടച്ചാൽ പലിശയും പിഴയും ഒഴിവാക്കും.

ബാർ ഹോട്ടലുകൾ 2005-06 മുതൽ 2020-21 വരെയുള്ള എല്ലാ ടേൺഓവർ ടാക്സ് കുടിശികയും സെസും പലിശയുടെ പകുതിയും അടയ്ക്കണം. ഡിസ്റ്റിലറികൾക്ക് 2022 ജൂൺ മുതൽ 2022 നവംബർ വരെ ടേണോവർ ടാക്സ് ഒഴിവാക്കിയിട്ടില്ലാത്തതിനാൽ കുടിശിക പൂർണമായി അടയ്ക്കണം.