തിരുവനന്തപുരം: ശമ്പളവർധനവ് ആവശ്യപ്പെട്ട് കെ.എസ്.ഇ.ബി. മീറ്റർ റീഡർമാർ നടത്തുന്ന സമരം ശക്തമാകുന്നതിനിടെ, പ്രതിഷേധക്കാരെ നേരിടാൻ ശക്തമായ നടപടിയുമായി വൈദ്യുതി വകുപ്പ്. കരാർ ജീവനക്കാരുടെ കൈവശമുള്ള പി.ഒ.എസ്. (POS) മെഷീനുകൾ തിരിച്ചേൽപ്പിച്ചില്ലെങ്കിൽ പോലീസ് നടപടി സ്വീകരിക്കുമെന്നാണ് ബോർഡിന്റെ മുന്നറിയിപ്പ്. മെഷീനുകൾ നൽകാത്തവരുടെ വിവരങ്ങൾ ഉടൻ പോലീസ് സ്റ്റേഷനുകളിൽ അറിയിക്കാൻ സെക്ഷൻ ഓഫീസുകൾക്ക് നിർദേശം നൽകി.
ശമ്പള വർധനവ് ഉൾപ്പെടെയുള്ള ആവശ്യങ്ങൾ ഉന്നയിച്ച് കരാർ ജീവനക്കാർ നടത്തുന്ന സമരം ഏഴാം ദിവസത്തിലേക്ക് കടന്നിരിക്കുകയാണ്. നാല് വർഷമായി വേതനത്തിൽ വർധനവുണ്ടായിട്ടില്ലെന്നും ഒരു റീഡിംഗിന് ലഭിക്കുന്ന തുക യാത്രാച്ചെലവിന് പോലും തികയുന്നില്ലെന്നുമാണ് സമരം ചെയ്യുന്നവരുടെ പരാതി. കഴിഞ്ഞ ദിവസം നടന്ന ചർച്ചകൾ പരാജയപ്പെട്ടതോടെ ബോർഡുമായി തർക്കം രൂക്ഷമായി.
സമരം തുടരുന്നത് കെ.എസ്.ഇ.ബിയുടെ വരുമാനത്തെയും ഉപഭോക്താക്കളെയും ഒരുപോലെ ബാധിക്കുന്നുണ്ട്. റീഡിംഗ് വൈകുന്നതോടെ സബ്സിഡി പരിധി കടന്ന് ഉയർന്ന വൈദ്യുതി ബിൽ തുക നൽകേണ്ടി വരുമെന്ന ആശങ്കയിലാണ് ഉപഭോക്താക്കൾ. അതിനിടെ, പോലീസ് നടപടി ഭയന്ന് പല കേന്ദ്രങ്ങളിലും റീഡർമാർ പി.ഒ.എസ്. മെഷീനുകൾ തിരിച്ചേൽപ്പിക്കാൻ തുടങ്ങിയിട്ടുണ്ട്. മന്ത്രിതല ഇടപെടലിലൂടെ വിഷയം പരിഹരിക്കപ്പെടുമെന്ന പ്രതീക്ഷയിലാണ് സമരക്കാർ.
