തിരുവനന്തപുരം : കാഴ്ചപരിമിതിയുള്ളവർക്കും ശാരീരിക അവശതകൾ മൂലം സ്വയം വോട്ട് രേഖപ്പെടുത്താൻ കഴിയാത്തവർക്കും നിയമസഭ തിരഞ്ഞെടുപ്പിൽ സഹായിയുടെ (Companion) സേവനം തേടാമെന്ന് ജില്ലാ കളക്ടർ അറിയിച്ചു. വോട്ടെടുപ്പിന്റെ സുതാര്യതയും രഹസ്യാത്മകതയും ഉറപ്പാക്കുന്നതിനായി കർശനമായ നിബന്ധനകളാണ് ഇതിനായി നിശ്ചയിച്ചിട്ടുള്ളത്.
പ്രധാന നിബന്ധനകൾ
* പ്രായപരിധി: സഹായിയായി എത്തുന്ന വ്യക്തിക്ക് 18 വയസ്സ് തികഞ്ഞിരിക്കണം.
* പരിധി: ഒരാൾക്ക് ഒരു ദിവസം ഒരു വോട്ടറെ മാത്രമേ സഹായിക്കാൻ അനുവാദമുള്ളൂ.
* സത്യപ്രസ്താവന: വോട്ടിന്റെ രഹസ്യസ്വഭാവം കാത്തുസൂക്ഷിക്കുമെന്ന സത്യപ്രസ്താവനയിൽ സഹായി ഒപ്പിട്ട് നൽകേണ്ടതുണ്ട്. വിവരങ്ങൾ പുറത്തുവിടുന്നത് ശിക്ഷാർഹമായ നിയമലംഘനമാണ്.
* മഷി അടയാളപ്പെടുത്തൽ: വോട്ടറുടെ ഇടത് ചൂണ്ടുവിരലിലും, സഹായിയുടെ വലത് ചൂണ്ടുവിരലിലുമാണ് മായ്ക്കാനാകാത്ത മഷി പുരട്ടുക.
* രേഖകൾ: ഇത്തരം വോട്ടർമാരുടെ വിവരങ്ങൾ പ്രിസൈഡിംഗ് ഓഫീസർ ഫോം 14A-യിൽ രേഖപ്പെടുത്തി റിട്ടേണിംഗ് ഓഫീസർക്ക് സമർപ്പിക്കണം.
യാത്രയ്ക്ക് മാത്രമുള്ള സഹായം
ശാരീരിക അവശതകൾ മൂലം നടക്കാൻ ബുദ്ധിമുട്ടുള്ളവർക്ക്, വോട്ടിംഗ് യന്ത്രത്തിന് അടുത്തുവരെ എത്താൻ സഹായിയെ കൂടെക്കൂട്ടാം. എന്നാൽ ഇവർക്ക് സ്വയം വോട്ട് ചെയ്യാൻ സാധിക്കുമെങ്കിൽ സഹായിയുടെ സത്യപ്രസ്താവനയോ ഫോം 14A-യിലെ രേഖപ്പെടുത്തലോ ആവശ്യമില്ല.
രഹസ്യസ്വഭാവ ലംഘനവും ശിക്ഷയും
1951-ലെ ജനപ്രാതിനിധ്യ നിയമത്തിലെ വകുപ്പ് 128 പ്രകാരം വോട്ടെടുപ്പിന്റെ രഹസ്യസ്വഭാവം ലംഘിക്കുന്നത് കുറ്റകരമാണ്. ഇത് ലംഘിക്കുന്നവർക്ക് മൂന്ന് മാസം വരെ തടവോ, പിഴയോ, അല്ലെങ്കിൽ ഇവ രണ്ടും കൂടിയോ ശിക്ഷയായി ലഭിക്കാം
