ദില്ലി: കായിക സംഘടനകളുടെ തലപ്പത്ത് രാഷ്ട്രീയക്കാരും വ്യവസായികളും ആധിപത്യം സ്ഥാപിക്കുന്നതിനെതിരെ കടുത്ത ഭാഷയിൽ വിമർശനമുന്നയിച്ച് സുപ്രീംകോടതി. ക്രിക്കറ്റ് അസോസിയേഷനുകളെ നയിക്കേണ്ടത് വിരമിച്ച കായികതാരങ്ങളായിരിക്കണമെന്നും അല്ലാതെ ഒരു ബാറ്റ് പോലും പിടിക്കാനറിയാത്തവരല്ലെന്നും ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് നിരീക്ഷിച്ചു.
മഹാരാഷ്ട്ര ക്രിക്കറ്റ് അസോസിയേഷൻ തെരഞ്ഞെടുപ്പുമായി ബന്ധപ്പെട്ട തർക്കം പരിഗണിക്കവെയാണ് കോടതിയുടെ ഈ സുപ്രധാന പരാമർശങ്ങൾ. 1986 മുതൽ 2023 വരെ വെറും 164 അംഗങ്ങൾ മാത്രമുണ്ടായിരുന്ന അസോസിയേഷനിൽ പെട്ടെന്ന് അംഗങ്ങളുടെ എണ്ണത്തിൽ ഉണ്ടായ വർധനവിനെ കോടതി പരിഹസിച്ചു. 2023-ന് ശേഷം ഇതൊരു 'ബമ്പർ ഡ്രോ' പോലെ മാറിയത് എങ്ങനെയെന്ന് കോടതി ചോദിച്ചു. പുതിയ അംഗങ്ങളെ ചേർക്കുന്നുണ്ടെങ്കിൽ ആ സ്ഥാനങ്ങൾ അന്താരാഷ്ട്ര താരങ്ങൾക്കായി മാറ്റിവെക്കണമായിരുന്നു എന്നും കോടതി ചൂണ്ടിക്കാട്ടി.
പ്രധാന നിരീക്ഷണങ്ങൾ:
* ക്രിക്കറ്റും ഹോക്കിയും നിലനിൽക്കുന്നത് താരങ്ങൾ ഉള്ളതുകൊണ്ടാണ്, ഭാരവാഹികൾ ഉള്ളതുകൊണ്ടല്ല.
* മുൻ താരങ്ങൾക്ക് അർഹമായ ബഹുമാനം നൽകിയേ മതിയാകൂ.
* വോട്ടർ പട്ടികയിൽ ക്രമക്കേട് ആരോപിച്ച് മുൻ താരം കേദാർ ജാദവ് നൽകിയ പരാതിയിൽ ബോംബെ ഹൈക്കോടതി തെരഞ്ഞെടുപ്പ് സ്റ്റേ ചെയ്തിരുന്നു.
* രാഷ്ട്രീയ സ്വാധീനം ഉപയോഗിച്ച് 401 പുതിയ അംഗങ്ങളെ നിയമവിരുദ്ധമായി ചേർത്തെന്ന വാദത്തിൽ ഹൈക്കോടതി അടിയന്തര തീരുമാനമെടുക്കണമെന്ന് സുപ്രീംകോടതി നിർദ്ദേശിച്ചു
.
