തിരുവനന്തപുരം: സ്കൂൾ പഠനയാത്രകൾ സംബന്ധിച്ച് വിദ്യാഭ്യാസ വകുപ്പ് നൽകിയ മാർഗ്ഗനിർദ്ദേശങ്ങൾ പാലിക്കാത്ത സ്കൂൾ അധികൃതർക്കെതിരെ കർശന നടപടി സ്വീകരിക്കുമെന്ന് വിദ്യാഭ്യാസമന്ത്രി വി. ശിവൻകുട്ടി മുന്നറിയിപ്പ് നൽകി. കുട്ടികളുടെ സുരക്ഷയ്ക്കാണ് പ്രഥമ പരിഗണന നൽകേണ്ടതെന്നും, നിർദ്ദേശങ്ങൾ ലംഘിക്കുന്നവരുമായി ഒരു വിട്ടുവീഴ്ചയും ഉണ്ടാകില്ലെന്നും മന്ത്രി വ്യക്തമാക്കി.
രാത്രിയാത്ര ഒഴിവാക്കണം; ചെലവ് കുറയ്ക്കണം
നിലവിലുള്ള പ്രധാന നിർദ്ദേശങ്ങൾ പല സ്കൂളുകളും പാലിക്കുന്നില്ലെന്ന് മന്ത്രി ചൂണ്ടിക്കാട്ടി. നിലവിൽ രാത്രി 9 മണി മുതൽ രാവിലെ 6 മണി വരെയുള്ള സ്കൂൾ വിനോദ-പഠന യാത്രകൾ ഒഴിവാക്കണമെന്ന നിർദ്ദേശമുണ്ട്. മോട്ടോർ വാഹന വകുപ്പിന്റെ നിബന്ധനകൾ പാലിക്കുന്ന വാഹനങ്ങൾ മാത്രമേ യാത്രക്കായി ഉപയോഗിക്കാവൂ എന്നും നിർബന്ധമാണ്.
"കുട്ടികളുടെ ജീവൻ വെച്ച് കളിക്കാൻ ആരെയും അനുവദിക്കില്ല. വരും ദിവസങ്ങളിൽ പരിശോധനകൾ കർശനമാക്കാൻ ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്," മന്ത്രി അറിയിച്ചു.
ചെലവ് ഭീമം; എല്ലാവർക്കും പങ്കെടുക്കാൻ കഴിയണം
വിനോദയാത്രകൾക്കായി ചില സ്കൂളുകൾ ഭീമമായ തുക ഈടാക്കുന്നുവെന്ന പരാതികളും മന്ത്രി ശ്രദ്ധയിൽപ്പെടുത്തി. എല്ലാ കുട്ടികൾക്കും യാത്രയിൽ പങ്കെടുക്കാൻ കഴിയുന്ന രീതിയിൽ ചെലവുകൾ പുനർനിർണ്ണയിക്കണം. സാമ്പത്തിക ബുദ്ധിമുട്ട് കാരണം കുട്ടികൾ ഒറ്റപ്പെട്ടു പോകുന്ന സാഹചര്യം സ്കൂളുകളിൽ ഉണ്ടാകരുത് എന്നും അദ്ദേഹം ഓർമ്മിപ്പിച്ചു.
പാലാ-തൊടുപുഴ റൂട്ടിൽ തോന്നയ്ക്കൽ ജി.എച്ച്.എസ്.എസിലെ വിദ്യാർത്ഥികൾ സഞ്ചരിച്ച വിനോദയാത്രാ ബസ് അപകടത്തിൽപ്പെട്ട സംഭവം സർക്കാർ അതീവ ഗൗരവത്തോടെയാണ് കാണുന്നത്. അപകടത്തിൽ ആർക്കും ഗുരുതരമായ പരിക്കില്ല എന്നത് ആശ്വാസകരമാണ്. പരിക്കേറ്റ കുട്ടികൾക്ക് ആവശ്യമായ ചികിത്സ ഉറപ്പാക്കുമെന്നും മന്ത്രി കൂട്ടിച്ചേർത്തു
