കൊച്ചി: തെരുവുനായകളുടെ ആക്രമണങ്ങള്‍ തടയുന്നതില്‍ കര്‍ശന നടപടികള്‍ വേണമെന്ന് ഹൈക്കോടതി. തെരുവുനായകളുടെ ആക്രമണത്തെ കുറിച്ചുള്ള നിരവധി ഹരജികള്‍ പരിഗണിക്കവെയാണ് കോടതി ശക്തമായ നിരീക്ഷണങ്ങളുമായി മുന്നോട്ടുവന്നത്. കുട്ടികളെപ്പോലുള്ള നിരപരാധികളാണ് ഇരയാകുന്നതെന്ന് ജസ്റ്റിസ് സി.എസ്. ഡയസ് വ്യക്തമാക്കി.
നായകളുടെ ആക്രമണവുമായി ബന്ധപ്പെട്ട് 9,000ത്തിലധികം പരാതികള്‍ അവഗണിക്കപ്പെട്ടിരിക്കുന്ന പശ്ചാത്തലത്തിലാണ് കോടതി ജസ്റ്റിസ് സിരിജഗന്‍ കമ്മിറ്റിയുടെ നിലവിലെ നിലപാട് വ്യക്തമാക്കണമെന്ന് സംസ്ഥാന സര്‍ക്കാരിനോട് ആവശ്യപ്പെട്ടത്. ഈ വിഷയത്തില്‍ തിങ്കളാഴ്ച കോടതിയില്‍ നിലപാട് അറിയിക്കണമെന്നു നിര്‍ദേശിച്ചു.
ലൈസന്‍സ് ഇല്ലാതെ തെരുവുനായകളെ കൂട്ടത്തോടെ പാര്‍പ്പിക്കുന്നത് നിയമവിരുദ്ധമാണെന്നും, നായകളെ സംരക്ഷിക്കേണ്ടത് ഒരു ബാധ്യതയായിരുന്നാലും അതിനുള്ള നിയമ നടപടികള്‍ അനുസരിക്കണമെന്നുമാണ് കോടതിയുടെ കർശന മുന്നറിയിപ്പ്.
ഇതിനകം തെരുവുനായയുടെ കടിയേറ്റ് കഷ്ടം അനുഭവിക്കുന്നവര്‍ക്ക് സംസ്ഥാന ദുരന്ത പ്രതികരണ നിധിയിലൂടെയുള്ള നഷ്ടപരിഹാരത്തെ കുറിച്ചും കോടതി സര്‍ക്കാരിനോട് നിലപാട് ആവശ്യപ്പെട്ടിട്ടുണ്ട്.
തെരുവുനായ പ്രശ്‌നം പൂര്‍ണമായി നിയന്ത്രിക്കേണ്ടത് അനിവാര്യമാണെന്ന് വ്യക്തമാക്കിയ ഹൈക്കോടതി, അടുത്ത നടപടികള്‍ സംബന്ധിച്ച നിലപാട് തിങ്കളാഴ്ച അറിയിക്കണമെന്ന് സര്‍ക്കാരിനോട് നിര്‍ദേശിച്ചു.
