കണ്ണൂർ :വിലക്കുറവും ഓഫറുകളുമായി സപ്ലൈകോയുടെ നിയോജക മണ്ഡലംതല ഓണം ഫെയറുകൾക്ക് ചൊവ്വാഴ്ച (10/09) തുടക്കമാവും. ഹൈപ്പർ മാർക്കറ്റുകളോടോ സൂപ്പർ മാർക്കറ്റുകളോടോ ചേർന്ന് സെപ്റ്റംബർ 14 വരെ രാവിലെ 10 മുതൽ രാത്രി എട്ട് മണി വരെ ഇവ പ്രവർത്തിക്കും.
സപ്ലൈകോ തളിപ്പറമ്പ് ഡിപ്പോയ്ക്ക് കീഴിലെ പയ്യന്നൂർ മണ്ഡലം ഓണം ഫെയർ പയ്യന്നൂർ പഴയ ബസ്‌സ്റ്റാൻറിന് സമീപത്തെ സപ്ലൈകോ സൂപ്പർ മാർക്കറ്റിൽ ചൊവ്വാഴ്ച രാവിലെ 9.30ന് ടി ഐ മധുസൂദനൻ എംഎൽഎ ഉദ്ഘാടനം ചെയ്യും. തളിപ്പറമ്പ് മണ്ഡലം ഓണം ഫെയർ തളിപ്പറമ്പ് സപ്ലൈകോ സൂപ്പർ മാർക്കറ്റിൽ രാവിലെ 10 മണിക്ക് നഗരസഭ ചെയർപേഴ്‌സൻ മുർഷിദ കൊങ്ങായി ഉദ്ഘാടനം ചെയ്യും.
ഇരിക്കൂർ മണ്ഡലം ഓണം ഫെയർ ശ്രീകണ്ഠപുരം സപ്ലൈകോ സൂപ്പർ മാർക്കറ്റിൽ രാവിലെ 10 മണിക്ക് ശ്രീകണ്ഠപുരം നഗരസഭ ചെയർപേഴ്‌സൻ ഡോ. കെ വി ഫിലോമിന ഉദ്ഘാടനം ചെയ്യും.
തലശ്ശേരി ഡിപ്പോയ്ക്ക് കീഴിലെ തലശ്ശേരി മണ്ഡലം ഫെയർ ചൊവ്വാഴ്ച രാവിലെ 9.30ന് തലശ്ശേരി സപ്ലൈകോ ഹൈപ്പർ മാർക്കറ്റിൽ നിയമസഭാ സ്പീക്കർ അഡ്വ. എ എൻ ഷംസീർ ഉദ്ഘാടനം ചെയ്യും.
പേരാവൂർ മണ്ഡലം ഓണം ഫെയർ രാവിലെ 10 മണിക്ക് ഇരിട്ടി സപ്ലൈകോ സൂപ്പർ മാർക്കറ്റിൽ അഡ്വ. സണ്ണി ജോസഫ് ഉദ്ഘാടനം ചെയ്യും. മട്ടന്നൂർ മണ്ഡലം ഓണം ഫെയർ രാവിലെ 10 മണിക്ക് മട്ടന്നൂർ സപ്ലൈകോ സൂപ്പർ മാർക്കറ്റിൽ നഗരസഭ വൈസ് ചെയർപേഴ്‌സൻ ഒ പ്രീതയും കൂത്തുപറമ്പ് മണ്ഡലം ഓണം ഫെയർ രാവിലെ 10 മണിക്ക് കൂത്തുപറമ്പ് സപ്ലൈകോ സൂപ്പർ മാർക്കറ്റിൽ കെ പി മോഹനൻ എംഎൽഎയും ഉദ്ഘാടനം ചെയ്യും.
കണ്ണൂർ ഡിപ്പോയ്ക്ക് കീഴിൽ അഴീക്കോട് മണ്ഡലം ഓണം ഫെയർ ചൊവ്വാഴ്ച രാവിലെ 10 മണിക്ക് അഴീക്കോട് മാവേലി സ്‌റ്റോറിൽ കെ വി സുമേഷ് എംഎൽഎ ഉദ്ഘാടനം ചെയ്യും. ധർമ്മടം മണ്ഡലം ഓണം ഫെയർ രാവിലെ 10 മണിക്ക് ചക്കരക്കല്ല് സൂപ്പർ മാർക്കറ്റിൽ എടക്കാട് ബ്ലോക്ക് പഞ്ചായത്ത് പ്രസിഡൻറ് പി കെ പ്രമീളയും കല്ല്യാശ്ശേരി മണ്ഡലം ഓണം ഫെയർ രാവിലെ 10 മണിക്ക് ചെറുകുന്ന് സൂപ്പർ മാർക്കറ്റിൽ കണ്ണപുരം ഗ്രാമപഞ്ചായത്ത് പ്രസിഡൻറ് കെ രതിയും ഉദ്ഘാടനം ചെയ്യും.
സപ്ലൈകോ ഓണം ഫെയറിൽ പതിമൂന്നിന സബ്‌സിഡി സാധനങ്ങൾക്ക് പുറമേ, പ്രമുഖ ബ്രാൻഡുകളുടെ ഉൽപ്പന്നങ്ങൾക്ക് വൻവിലക്കുറവാണ് നൽകുന്നത്. ഓണം ഫെയറുകളിലും സപ്ലൈകോയുടെ സൂപ്പർ മാർക്കറ്റുകളിലും ഡീപ്പ് ഡിസ്‌കൗണ്ട് അവേഴ്‌സും നടപ്പാക്കിയിട്ടുണ്ട്. വിവിധ സബ്‌സിഡി ഇതര സാധനങ്ങൾക്ക് സപ്ലൈകോ നിലവിൽ നൽകുന്ന വിലക്കുറവിന് പുറമേ 10% വരെ വിലക്കുറവായിരിക്കും ഡീപ്പ് ഡിസ്‌കൗണ്ട് അവേഴ്‌സിൽ നൽകുക. ഉച്ച രണ്ടു മുതൽ നാലുമണിവരെ ആയിരിക്കും ഡീപ്പ് ഡിസ്‌കൗണ്ട് അവേഴ്‌സ്.
